Dy vjet pas pezullimit të tij në detyrë, ish-kryegjyqtari i Gjirokastrës, Guximtar Boçi, ka kërkuar rikthimin e tij në detyrë. Kjo kërkesë e tij vjen pas shpalljes së pafajësisë, nga vendimi i Gjykatës së Apelit në Vlorë në muajin shtator të vitit 2018.
Skandali i tij u bë publik nga emisioni investigativ “Stop”, në të njëjtën ditë kur vajza e madhe e Boçit po kryente ceremoninë e martesës.
Në kërkesën bërë në datën 20.12.2018 për revokimin e masës së pezullimit të ushtrimit të detyrës së gjyqtarit dhënë me vendim nr 102. dt 28.10.2016 të KLD-së, theksohet se shkarkimi u krye në 28.10.2016 pas një mbledhjeje të jashtëzakonshme me kërkesë të Ministrit të Drejtësisë së kohës.
Ja çfarë thuhet në kërkesë:
Sipas procesverbalit të kësaj mbledhjeje rezultoi se një pjesë e mirë e anëtarëve të KLD kanë kërkuar shtyrjen e mbledhjes për të verifikuar rastin dhe për t’i dhënë personit të akuzuar të drejtën për t’u dëgjuar, por, gjithmonë sipas këtij procesverbali, vendimi i shkarkimit është dhënë pas këmbënguljes së Ministrit të Drejtësisë dhe kryetarit të KLD se mosmarrja e masave konkrete do t’i dënonte në sytë e opinionit publik.”
Shkarkimi i i Guximtar Boçit, u vendos pas disa fakteve të bëra publike në media, ku ai akuzohej për afera seksuale dhe korrupsion pasiv.
Kërkesa e gjyqtarit të Gjirokastrës për rikthimin në detyrë, vjen në kohën kur hetimet nuk kanë konkluduar në favor të kërkesës së shtetases R.I. duke rrëzuar kështu shkakun e pezullimit të ish- kryegjyqtarit. Ndërsa çështja penale është pushuar dhe ankimimet ndaj vendmit janë pezulluar me vendim gjyqësor të formës së prerë.
Ish-gjyqtari Boçi ka drejtuar kërkesa në mënyrë të përsëritur në KLD-së, duke kërkuar rikthimin në detyrë.
Kërkesat e tij nuk janë marrë në shqyrtim. Kërkesa e parë është drejtuar në datën 9 qershor 2017, ndërsa e fundit që i drejtohet organit të ri KLGJ-së mban datën 20 dhjetor 2018.
