Gazmend Musta ka telefonuar të atin pak pasi ekzekutoi bashkëshorten dhe kunatën, zbulojnë hetimet e prokurorisë së Krimeve të Rënda.
Në dosjen e organit të akuzës, zbulohet dëshmia e të atit të Gazmendit, i cili tregon rreth bisedës së fundit me të birin.
B.Musta ka deklaruar se mori dijeni për ngjarjen nga i biri Gazmendi, i cili i telefonoi dhe i tha se vrau të shoqen dhe kunatën. Sipas të atit të të dyshuarit, më pas, i biri i tha që “t’ia bënte hallall dhe se do piqeshin në botën tjetër”.
B.Musta ka deklaruar mes të tjerash në dëshminë e tij se disa muaja para krimit, Gentjana ishte larguar nga shtëpia për të shkuar tek e prindërve në Drizar dhe se prej atje kishte shkuar pa treguar te shtëpia e xhaxhait të saj në Fier, prej nga kishte hezituar të kthehej përsëri në banesën bashkëshortore. B. Musta ka pretenduar se kishte qenë ngulmimi i tij dhe i të birit që kishin bërë të mundur rikthimin e Gentjanës në banesën bashkëshortore për të vijuar martesën, duke i plotësuar asaj disa kërkesa që ajo kishte për të qenë më e lirë dhe për të pasur mundësi të komunikonte me një telefon celular.
B.Musta shpjegoi në dëshminë e tij se i biri, para shumë vitesh kishte qenë në Greqi për punë dhe se kishte rreth 6 vite që ishte kthyer prej andej.
