Presidenti amerikan Donald Trump dhe udhëheqësit e Kongresit pritet të takohen të premten paradite në Shtëpinë e Bardhë për të diskutuar se si do t’i japin fund mbylljes së pjesshme të qeverisë, e cila ka hyrë në javën e saj të tretë.
Takimi vjen një ditë pas betimit të një grupi të ri ligjvënësish duke bërë që Dhoma e Përfaqësuesve të udhëhiqet tashmë nga demokratët.
Të enjten kjo dhomë miratoi një plan për të rihapur qeverinë federale.
Por paketa nuk përfshin shumën prej 5 miliardë dollarësh që presidenti ka kërkuar për ndërtimin e një muri në kufirin jugor të vendit me Meksikën.
Ideja e masave është rihapja e qeverisë ndërsa çështja e murit të lihet për negociata të veçanta.
“Nuk do të ndërtojmë mur,” tha demokratja Nancy Pelosi, pasi bëri betimin si kryetarja e re e Dhomës së Përfaqësuesve. Sipas saj do të ishte më mirë që paratë të përdoreshin për teknologjinë e sigurisë kufitare dhe punësimin e më shumë agjentëve kufitarë.
Por udhëheqësi republikan i Senatit Mitch McConnell e cilësoi paketën ligjore të Dhomës së Përfaqësuesve “teatër politik” edhe pse Senati i udhëhequr nga republikanët miratoi një projektligj identik muajin e kaluar.
Legjislacioni i miratuar të enjten në Dhomën e Përfaqësuesve parashikon rihapjen e qeverisë federale dhe financimin e Departamentit të Sigurisë Kombëtare deri në fillim të muajit shkurt.
Ndërsa vetë Presidenti Donald Trump nuk e ka përdorur fjalën “veto”, të tjerë zyrtarë të Shtëpisë së Bardhë e kanë përmendur si mundësi. Një zyrtar tha se presidenti u kishte thënë udhëheqësve demokratë se ai “do të dukej si i marrë” në qoftë se i jepte fund mbylljes së pjesshme të qeverisë.
Trump fajëson demokratët
Presidenti Trump fajëson demokratët për situatën aktuale.
“Mbyllja e qeverisë ka të bëjë vetëm me zgjedhjet presidenciale të vitit 2020”, shkroi ai të enjten në twitter. “Demokratët e dinë se nuk mund të fitojnë për shkak të të gjitha arritjeve të Trumpit, kështu që ata janë përqendruar në murin dëshpërimisht të nevojshëm dhe sigurinë e kufirit…Për ta është thjeshtë politikë”.
Presidenti Trump tha se vendi ka nevojë për mbrojtje dhe tërhoqi vërejtjen se krimi, drogat dhe bandat po vërshojnë në Shtetet e Bashkuara nga Meksika.
Ai tha se më shumë se 35 milionë emigrantë të paligjshëm janë në Shtetet e Bashkuara duke rënë në kundërshtim me ekspertët që pohojnë se ky numër është shumë më i vogël, shkruan Zëri i Amerikës.
Ndërkohë, 800 mijë punonjës federalë po qëndrojnë në shtëpi ose punojnë pa pagesë prej dy javësh.
Pirgjet e mbeturinave po rriten në parqet kombëtare, të cilat janë mbyllur zyrtarisht, sikurse edhe shumica e objekteve më të njohura turistike të Uashingtonit.
