Policia ka sekuestruar dhe ka verifikuar kamerat e sigurisë së disa bizneseve private në vendin ku u vra 17-vjeçarja Griselda Gjikola dhe u plagos i dashuri i saj Erjon Benga.
Gjithashtu janë verifikuar edhe disa kamera të tjera, përreth vendit të ngjarjes, për të parë rrugën që kanë ndjekur autorët e ngjarjes, para dhe pas ngjarjes.
Burimet thanë se disa kamera sigurie të bizneseve përreth kanë filmuar momentin e atentatit ndaj Erjon Bengës në Laprakë, ku mbeti e vrarë 17-vjeçarja Griselda Gjikola.
Të njëjtat burime thanë se nga pamjet e kamerave të sigurisë, njëri prej autorëve, tashmë i identifikuar me emrin Robert P., shfaqej më i qartë në kamera, edhe pse mbante një kapuç në kokë.
Ai dukej kur priste disa metra më tej lokalit, ku po pinin kafe dy të rinjtë dhe ka lëvizur në drejtim të makinës së tyre në momentin që ata kanë dalë nga lokali.
Sipas pamjeve filmike, i dyshuari ka pritur momentin kur çifti të futej në makinë dhe sapo mjeti është ndezur është afruar, duke qëlluar 4 herë në drejtim të shoferit nga xhami i pasmë i makinës.
Menjëherë pas krimit, 19-vjeçari Robert P., është larguar i ndihmuar edhe nga një person tjetër ende i paidentifikuar.
