“Duhet të kemi shkallëzim meritokratik tek tarifat universitare”.
Ky ishte propozimi i Kryeministrit Edi Rama, në një takim me studentë të Universitetit të Vlorës.
Duke iu përgjigjur njërës prej kërkesave të tyre që kishte të bënte me përgjysmimin e tarifave, Kryeministri u shpreh se “kjo është diçka që duhet diskutuar, pasi duhet të kemi shkallëzim meritokratik tek tarifat”.
Por këtë, tha Rama, “nuk e vendos dot askush me dhunë, ultimatum apo kërcënime”.
“Ju kërkoni përgjysmim të tarifave për të gjithë. Po pse, për të gjithë njësoj? Nëse dikush vjen nga një familje me ndihmë ekonomike dhe dikush tjetër është biznesmen; nëse dikush merr katra dhe është krenar dhe një tjetër merr nënta dhe dhjeta; përse shoqëria duhet t’i paguaj njësoj me taksat e veta dhe t’i mbaj të gjithë njësoj me pekule”, tha Rama.
Ne duhet t’i adresojmë se këto janë shqetësime, tha Rama, ndërsa shtoi se “është dakord kur thuhet se këto janë gjëra të rëndësishme elementare, por nevojitet dialog”.
