Biznesmeni Bardhok Pllanaj është një emër i njohur për policinë. 4 vite më parë, i dyshuar si trafikant narkotikësh, Pllanaj arriti t’i shpëtonte policisë dhe u fsheh në automjetin e ish-deputetit Mark Frroku. Ngjarje kjo e cila trazoi politikën katër vite më parë si një skandal i përmasave të mëdha, por që Frroku e mohoi një gjë të tillë. Nga ana tjetër, ishte raporti i oficerëve të gjurmimit në sektorin e narkotrafikut ku shkruhet se i dyshuari në survejim prej tyre ka lëvizur nga lokal “Antika” në Tiranë drejt Laprakës me automjetin “Audi” në pronësi të deputetit. 44-vjeçari ishte në kërkim policor në 2014-ën i dyshuar për trafik droge.
I njohur ndryshe si “Kumbari” i Shkodrës, Pllaja mbahej në vëzhgim prej disa kohësh si i përfshirë në trafik droge për llogari të operacionit “Lugina Vilunit”, ku u sekuestruan rreth 804 kg drogë e lloji kanabis në momentin kur po tentohej të trafikohej drejt Italisë me gomone. Droga u hodh nga trafikantët në det në vendin e quajtur Rana e Hedhun në Shëngjin pasi ata panë shërbimet e policisë. Koka i trafikut u dyshua pikërishit biznesmeni Bardhok Pllanaj.
Në momentin kur policia u vu në ndjekje të tij, Pllanaj gjeti strehë në automjetin “Audi” të ish-deputetit Mark Frroku. Ky i fundit, duke përfituar nga imuniteti si deputet i Kuvendit të Shqipërisë, nuk lejoi kontrollin e makinës nga policia, brenda të cilës ndodhej pikërisht Bardhok Pllanaj.
Këtë të hënë policia e Shkodrës vuri në pranga 44-vjeçarin Bardhok Pllanaj për 3 akuza: “Pastrim parash”, “Falsifikim dokumentesh” dhe “Ndërtim pa leje”. Disa orë më pas, policia e arrestoi 44-vjeçarin, pasi dyshohet se ka ndërtuar një pallat 10-katësh me para nga burime kriminale dhe pa leje ndertimi.
