Kompanitë të cilat do të kryejnë zbatimin e projektit për Unazën e Madhe të Tiranës në segmentin Pallati me Shigjeta-Shkolla Teknologjike kanë vazhduar normalisht punën që në orët e para të mëngjesit. Aktualisht mësohet se po kryhet ndërhyrja për spostimin e korsive të kalimit të automjeteve në funksion të skemës së re të trafikut e cila do të zbatohet në kushtet e kantierit të hapur nga Autoriteti Rrugor Shqiptar. Përmes këtij spostimi u krijohet hapësira e nevojshme kompanive për të avancuar me punimet në funksion të projektit të Unazës së Tiranës.
ARRSH, Policia Rrugore dhe Bashkia e Tiranës kanë njoftuar se gjatë zhvillimit të punimeve në kantier do të ketë skema alternative të qarkullimit të automjeteve me synim që të mos bllokohet për asnjë moment kalimi përmes këtij aksi mjaft të rëndësishëm. Deri në muajin Janar, në këtë segment do të funksionojnë të dyja senset e kalimit me nga 3 korsi por më të ngushta se sa janë zakonisht. Me fillimin e prishjeve, skema do të ndryshojë në 5 korsi duke u alternuar në varësi të trafikut të mjeteve.
