Kryetari i Kuvendit të Republikës së Kosovës, Kadri Veseli, ka pritur në takim komandantin e ri të KFOR-it në Kosovë, Lorenzo D’Addario, të cilin e ka uruar për detyrën e re dhe i ka ofruar bashkëpunim të plotë institucional në funksion të përmbushjes së detyrave dhe misionit të tij në shërbim të të gjithë qytetarëve pa dallim.
Në këtë takim, kryeparlamentari Veseli dhe komandanti i ri i KFOR-it kanë diskutuar për bashkëpunimin ndërmjet forcave të NATO-s në Kosovë dhe institucioneve kosovare. Komandanti i ri i KFOR-it, D’Addario, e ka njoftuar kryeparlamentarin Veseli për gjendjen e sigurisë në Kosovë e cila është e qetë dhe stabile, ndërsa theksoi se KFOR-i ka bashkëpunim të ngushtë me të gjitha institucionet e sigurisë në Kosovë.
Veseli dhe D’Addario, po ashtu, kanë diskutuar për zhvillimet politike dhe të sigurisë në vend dhe për të arriturat e shtetit të Kosovës në të gjitha fushat.
Kryeparlamentari Veseli e ka njoftuar komandantin e ri të KFOR-it për hapat përfundimtarë që do të ndërmerrë Kuvendi i Republikës së Kosovës gjatë muajit dhjetor për transformimin e Forcës së Sigurisë së Kosovës në Forca të Armatosura. Veseli tha me këtë rast se Forcat e Armatosura të Kosovës do të jenë një forcë e përgatitur mirë, multietnike dhe aleate e denjë e NATO-s për të ofruar paqe në gjithë rajonin dhe më gjerë.
Ceremoninë e Ndërrimit të Komandës, në mes të Komandantit në largim të KFOR-it, gjeneralmajor General Salvatore Cuoci dhe Komandantit në ardhje të KFOR-it, gjeneralmajor Lorenzo D’Addario është zhvilluar në 28 Nëntor në Shtabin e Përgjithshëm të KFOR-it, Kampi “Film City”, në Prishtinë.
Në vitin 1999 të lirisë së Kosovës – hyrjes së farcës paqeruajtëse e shpëtimtare të NATO-s, komandanti i parë i forcës paqeruajtëse të NATO-s – KFOR-it ishte gjenerali britanik, Michael Jackson.
