Është firmosur kontrata për fillimin e punimeve për Bypass-in e Fierit.
Lajmin e ka dhënë vetë ministri Damian Gjiknuri i cili përmes një postimi në rrjetin social Facebook thotë se vlera e financimit për përfundimin e kësaj vepre është 37,944,221 Euro.
Ndër të tjera ai shkruan:
“Pas përmbylljes së procedurave konkuruese të përzgjedhjes së kompanive kontraktore që do kryejnë punimet e Bypass-it të Fierit dhe dorëzimit të garancisë financiare, Autoriteti Rrugor Shqiptar ka firmosur kontratën me kompaninë fituese “CGC, Combined Group Contracting”. Kontrata ka vlerën e financimit 37,944,221 Euro për përfundimin e kësaj vepre.
Nga dita e sotme kompania kontraktore fillon punën në terren duke ringritur kantierin me objektivin për të bërë të kalueshëm bypass-in e Fierit në sezonin e ardhshëm turistik.
Ndërkaq, në ditët e ardhshme do të kryhet dhe firmosja e kontratës me kompaninë fituese të Bypass-it të Vlorës për të mundësuar edhe aty fillimin e punës“, nënvizon Gjiknuri.
