Ish-ministri i Brendshëm Saimir Tahiri ka vendosur të flasë çdo ditë pas një heshtjeje të gjatë. Ai ka publikuar sot një video në profilin e tij në “Facebook”, dhe kërkon ndihmë që kjo video të shpërndahet sipas tij që e vërteta të bëjë më shumë rruge se gënjeshtra.
“Të lutem shpërndaje ti tek miqtë e tu! Që e VËRTETA të bëjë më shumë rruge se gënjeshtra, duhet ndihma jote”.
Videoja nis me vendimin e fundit të Gjykatës së Katanias që ka pushuar hetimin nga ish-ministrit për të treguar më tej se si nisën ngjarjet ku u akuzua Tahiri. Në video shfaqet kreu i PD-së Lulzim Basha më 17 tetor 2017 ku i kërkon Ramës të arrestojë Tahirin. më pas më 21 tetor 2017 momenti kur tre prokurorë të Krimeve të Rënda kërkojnë nga Kuvendi heqjen e imunitetit për arrestimin e ish-ministrit. Videoja vazhdon me deklaratën e Tahirit më 3 maj 2018 kur la mandatin e deputetit për t’u hetuar. “Unë nuk jam si këta. unë dua vetëm të vërtetën time të plotë”, do të shprehej ai.
Më tej në video thuhet se prokuroria shtyu katër herë hetimet: 17 janar 2018; 17 prill 2018; 17 korrik 2018 dhe 17 tetor 2018 në pritje të letrave nga Italia. Më 5 tetor 2018 Gjykata e Katanias i jep fund hetimit për Saimir Tahirin. Për ish-ministrin Antimafia italiane zbardhi të vërtetën.
