Gazeta britanike “Financial Times” ka vlerësuar se zyrtarët e SHBA dhe BE janë gjithnjë e më shumë “të nxehtë” dhe se Berlini “po zbut” qëndrim kur bëhet fjalë për idenë e korrigjimit të kufijve dhe shkëmbimit të territoreve, si një zgjidhje e problemit të Kosovës.
Në analizën e fundit “Plani ballkanik që meriton mbështetjen e të matur”, Financial Times merret me çështjen e rrezikut dhe përfitimeve të idesë së presidentit të Serbisë dhe atij të Kosovës, Aleksandar Vuçiq dhe Hashim Thaçi, për një korrigjim të mundshëm të kufijve dhe shkëmbimin e territoreve.”Zgjidhja e situatave konfliktuale shpesh kërkon nga udhëheqësit hapa të guximshëm, madje edhe ato që kanë qenë dikur tabu. Në këtë rast, nëse presidentët mund të arrijnë një marrëveshje, përfitimet e mundshme për Serbinë, Kosovën dhe rajonin e gjerë janë të mjaftueshme për të merituar mbështetjen e kujdesshme ndërkombëtare. Zyrtarët e SHBA-së dhe BE-së janë gjithnjë e më ‘të ngrohur’ për planin.
Megjithëse kancelarja gjermane Angela Merkel kritikoi idenë, duket se qëndrimi i Berlinit po zbutet”, shkruan gazeta britanike. Financial Times shkruan se historia ka treguar se “prekja” e kufijve në Ballkan është më e rrezikshme se në çdo pjesë të Evropës, por gjithashtu presidenti serb Aleksandar Vuçiq dhe homologu i tij Hashim Thaçi po lëvizin drejt një marrëveshje kyçe që synon normalizimin e marrëdhënieve, e cila përfshin pikërisht korrigjimin e kufijve dhe shkëmbimin e territorit, transmeton KosovaPress.
Tutje, në analizë thuhet se arritja e marrëveshjes do të nënkuptonte përparimin e Serbisë drejt anëtarësimit në BE dhe daljen e Kosovës nga “limba ndërkombëtare” në të cilën bazohet në shpalljen e pavarësisë në vitin 2008. Në të njëjtën kohë, sipas FT-së, kjo do të kontribuonte në vazhdimin e procesit të eurointegrimit të të gjithë rajonit dhe do të forconte momentin e zgjidhjes së çështjeve komplekse të nisura nga bisedimet për emrin ndërmjet Athinës dhe Shkupit. “Pasoja më e rrezikshme mund të ishte inkurajimi i liderëve të tjerë dhe njerëzve nga rajoni i ish-Jugosllavisë, kryesisht serbëve nga Bosnja, për të rikthyer kufizimet që nuk u pëlqen”, paralajmëron Financial Times. Analiza thotë se të gjitha detajet e planit ende nuk janë të njohura, dhe presidentët Vuçiq dhe Thaçi janë të ftuar të paraqesin idetë e tyre në mënyrë më transparente.
