Plagosja e efektivit të Komisariatit nr.1 të Tiranës, mbrëmjen e së martës tek ishParku i Autobusëve, mund të ketë ndodhur edhe për shkak të detyrës.
Nga këqyrja e pamjeve të kamerave të sigurisë, që u sekuestruan pas ngjarjes, Policia nuk ka konstatuar që mes policit 30-vjeçar Ermal Bregu dhe autorit të ketë pasur debat apo konflikt fizik.
Ndërsa i dyshuari, tashmë në kërkim, Daniel Manushi, e ka qëlluar efektivin Bregu pa paralajmërim. Pasi e ka kërcënuar verbalisht, fillimisht në ambientet e lokalit ku Ermal Bregu po pinte kafe me një shok, autori ka dalë nga lokali, duke e pritur i fshehur në rrugë.
Në momentin që 30-vjeçari ka dalë jashtë lokalit, për të parë se kush ishte personi që e shau dhe kërcënoi në lokal, ky i fundit i ka dalë përpara duke e qëlluar menjëherë me pistoletë. Nga pamjet e kamerave të sigurisë, duket që në drejtim të efektivit është qëlluar 4 herë, por vetëm dy nga plumbat e kanë goditur.
FILMIMI NE LOKAL
Nga këqyrja e kamerave të sigurisë, në ambientet e brendshme të lokalit, në rrugën “Kongresi i Lushnjës” në Tiranë, duket efektivi Ermal Bregu, i ulur në një tavolinë bashkë me një mikun e tij. Në lokal futet një person, i identifikuar si 23- vjeçari Daniel Manushi.
Ky person drejtohet nga tavolina ku ishte ulur efektivi. Duke i drejtuar gishtin, ai e fyen dhe me njërën dorë ngre bluzën, duke i treguar pistoletën që mbante në brez. Pas këtij veprimi, autori del nga lokali, ndërsa efektivi Ermal Bregu shfaqet duke biseduar me shokun, me të cilin ishte në tavolinë. Brenda pak sekondash, Bregu ngrihet nga tavolina dhe del jashtë lokalit, ku më pas është plagoset me armë zjarri nga i dyshuari Daniel Manushi.
FILMIMET NE RRUGE
Policia e Tiranës ka administruar si provë edhe pamjet e kamerave të sigurisë së një farmacie pranë vendit ku ndodhi ngjarja. Nga analizimi i këtyre pamjeve është zbardhur edhe momenti i plagosjes së efektivit Ermal Bregu.
Në pamjet filmike është fiksuar momenti kur efektivi del nga lokali ku ishte ulur dhe kontrollon me sy për të parë personin që e kërcënoi në lokal. Në këtë moment, i dyshuari Daniel Manushi i del para me pistoletën e drejtuar përballë tij, të cilën e shkrep menjëherë.
Autori ka qëlluar 4 herë në drejtim të efektivit 30-vjeçar, por duke qenë se Ermal Bregu ka lëvizur sapo ka parë pistoletën, është prekur nga dy plumba. Një plumb tejshpues, që e ka kapur tanget në bark dhe një tjetër në krahun majtë, që i ka dëmtuar kockën.
Në këtë moment autori, të cilin e priste disa metra më tej shoku i tij, 25-vjeçari me iniciale E.K., që gjithashtu është shpallur në kërkim, është larguar me shpejtësi nga vendi i ngjarjes. Ndërsa efektivi i plagosur rezulton të jetë larguar në drejtim të spitalit me automjetin e tij.
TE KERKUARIT
Policia e Tiranës ka shpallur në kërkim dy të dyshuar për plagosjen e efektivit Ermal Bregu, mbrëmjen e së martës në Tiranë. Mësohet se autori kryesor i ngjarjes është 23-vjeçari Daniel Manushi, i lindur në Gjermani dhe banues në Yzberisht.
Sipas Policisë, Manushi është personi që ka shkrepur pistoletën, duke plagosur efektivin Ermal Bregu. Ndërsa bashkëpunëtori i tij është shtetasi me iniciale E.K., 25 vjeç, banues në Bërxull. Ky person, sipas burimeve, ka qenë më tepër në rolin e përkrahësit të autorit të krimit, por pa marrë pjesë në ngjarje.
