“Gjermania ka dhënë kontributin e saj në procesin e shtetndërtimit në Kosovë dhe roli i saj mbetet thelbësor për rrugën e Kosovës drejt Europës”.
Kështu deklaroi sot, ambasadori i Kosovës në Tiranë, Sylë Ukshini, i cili zhvilloi një vizitë në Ambasadën e Republikës Federale të Gjermanisë në Tiranë, ku u prit nga ambasadorja Susanne Schutz.
Gjatë takimit u bisedua për zhvillimet politike në Kosovë dhe në rajon, si dhe për procesin e liberalizimit të vizave. Po ashtu, temë e diskutimeve ishte edhe fuqizimi i subjektivitetit ndërkombëtar të Kosovës, avancimi i axhendës integruese europiane dhe thellimi i bashkëpunimit dypalësh.
Në këtë takim, ambasadori Ukshini nënvizoi se, “mbështetja e shtetit gjerman në të gjitha fazat e procesit të shtetndërtimit në Kosovë ka qenë thelbësore”.
“Partneriteti ynë me Gjermaninë dhe Aleanca transatlantike janë orientimi kryesor i politikës sonë të jashtme”, – tha ai.
