Zbulon detaje të reja për laboratorin e heroinës që u zbulua ditën e premte në fshatin Brenog të Hasit. Gazetari i Report Tv, Dricim Caka duke iu referuar burimeve nga grupi hetimor pohon se drejtuesi i laboratorit në Has është A. Hoxha nga Kruja.
Ai është pronar i një hoteli në Rinas, ndërsa prej tre ditësh ndodhet në kërkim nga policia, që akoma nuk ka arritur ta prangosë. Hoxha dyshohet se drejtonte aktivitetin e grupit kriminal të heroinës në Has.
Deri tani të arrestuar janë; Xhavit Shuti, Anila Shuti, Mustafa Shuti, Flamur Cela, Vehbi Barushi dhe një turk. Ai dyshohet se është biznesmen dhe pikërisht nëpërmjet biznesit të tij kamuflohej sjellja e bimëve të opiumit në Shqipëri.
Në kërkim janë edhe dy turq të tjerë dhe shqiptari A. Hoxha. Brenda laboratorit të drogës në Brenog të Hasit, janë gjetur më shumë se 200 kg heroinë. Ndërkohë që objekti ku ishte ngritur laboratori vijon që të ruhet nga forcat e policisë.
