Janë identifikuar protagonistët e ngjarjes së ndodhur në Hotel “Atlante”.
Mediat italiane raportojnë se shqiptari është shtetasi Arlin Cera, 33 vjeç, me profesion kamarier. Ndërsa personi i dytë është italiani Lillo Luciani, 38 vjeç nga Bari, me banim në Villa Rosa.
Sipas po të njëjtave mediave, sherri ka nisur brenda ambjenteve të hotelit, ku po zhvillohej një mbrëmje me muzikë, për të vijuar më pas në ambientet e jashtme.
Në sherr e sipër, shqiptari u qëllua me thikë brenda lokalit dhe në tentativë për t’u mbrojtur nxori pistoletën duke qëlluar me të italianin.
Policia ka bërë me dije se ka identifikuar edhe dy persona të tjerë të përfshirë në këtë perleshje, por emrat e tyre nuk janë bërë ende të ditur.
Sipas një rindërtimi paraprak të ngjarjes nga karabinierët, ka pasur një përplasje me fjalë mes një grupi italian dhe një grupi shqiptar.
Të dy të plagosurit janë me precedentë të mëparshëm. Sa i takon shqiptarit, raportohet se është kapur me mallra të vjedhur së fundmi.
Mediat italiane bëjnë me dije se gjithçka pritet të sqarohet nga dëshmia që do të japin dy personat, që për fat janë jashtë rrezikut për jetën.
Për momentin, disa dhoma të Hotel “Atlante” janë ende nën sekuestrim.
