Presidenti Donald Trump ka deklaruar të dielën në një intervistë për CBS se Sekretari i Mbrojtjes, Jim Mattis, mund të jetë një nga zyrtarët e tij të ardhshëm që mund të largohet nga qeveria.
Udhëheqësi amerikan e përshkroi gjeneralin në pension si “një njeri të mirë”. “Ne shkojmë shumë mirë, por mund të largohet, pasi në një moment të gjithë largohen”, ka shtuar Trump.
Gjatë administratës së tij 21-mujore, Trump ka shkarkuar ose detyruar të largohen dhjetëra zyrtarë të rëndësishëm.
Rasti më i fundit mendohet të jetë ambasadorja në Kombet e Bashkuara, Nikki Haley, e cila tha javën e kaluar se do ta linte postin e saj në fund të vitit.
Mattis, duke udhëhequr ushtrinë amerikane, herë pas here ka qenë në kundërshtim me presidentin Trump si dhe me shumë zyrtarë të administratës së tij, duke përfshirë këshilltarin e Sigurisë Kombëtare John Bolton.
Në mes të vitit 2017, Mattis bëri thirrje për më shumë opsione diplomatike me Korenë e Veriut në lidhje me programin e armëve bërthamore të Phenianit. Këtë qëndrim presidenti Trump e përkrahu dhe këtë e konfirmoi me mbajtjen e samitit të qershorit me udhëheqësin e Koresë së Veriut, Kim Jong Un.
