Zbardhet drafti i Partisë Socialiste për Reformën Zgjedhore. Në draftin e PS, propozohen 52 ndryshime në Kodin Zgjedhor. Ndër ndryshimet kryesore është ai për depolitizimin e administratës zgjedhore në tre nivele, KZAZ, KQV, GNV.
Propozohet përzgjedhja me short dhe jo më nga partitë politike të anëtarëve të tre strukturave. Drafti parashikon gjithashtu, kufizimin e parave të shpenzuara në fushatë, shuma për një parti politike, përfshirë kandidatët e saj, nuk mund të jetë 2 herë më e madhe se shuma e përfituar nga shteti.
PS kërkon gjithashtu që partitë të mos bëjnë reklama politike kundrejt pagesës 3 muajt para zgjedhjeve. Në draft propozohet që institucioneve shtetërore nuk u lejohet gjatë kësaj periudhe transmetimi i reklamave të paguara apo financuara prej tyre.
Neni 31
Në nenin 90 bëhen këto ndryshime:
– Pika 2 fjalët “100 mijë lekë” ndryshohen në “30 mijë lekë”.
– pika 3 ndryshohet si vijon:“3. Shuma e shpenzimeve të bëra nga një parti politike, përfshirë kandidatët e saj, për një fushatë zgjedhore nuk duhet të jetë më shumë se 2 herë më e madhe se shuma më e lartë që ka marrë një subjekt zgjedhor nga fondet publike për qëllime zgjedhore, në përputhje me nenin 87/3 të këtij Kodi. Çdo shpenzim i fushatës zgjedhore dokumentohet dhe zbatohet në përputhje me legjislacionin fiskal në fuqi. Për zbatim të këtij Kodi “shpenzim për fushatë”është çdo shpenzim që bën një parti ose kandidatët e saj për qëllime të fushatës zgjedhore, pavarësisht datës se kur është bërë.”Në nenin 84 behen këto ndryshime:
– Pika 4 ndryshohet si vijon: “4. Partitë politikë dhe çdo subjekt tjetër e ka të ndaluar bërjen e reklamave politikë kundrejt pagesës 3 muajt fundit para datës së zgjedhjeve.”
– Pika 5, pika 6, pika 7, pika 8 dhe pika 9 shfuqizohen.
– Pika 10 ndryshohet si vijon: “10. Ndalohet transmetimi i reklamave të paguara ose të financuara nga institucionet shtetërore dhe/ose nga çdo ent publikapo shoqëri tregtare ku shteti ka aksione për periudhën kohore 3 muaj para datës së zgjedhjeve deri në datën e zgjedhjeve, me përjashtim të atyre qëtransmetohen për rritjen ndërgjegjësimit të zgjedhësve, nxitjen e pjesëmarrjes në votim apo aspekte të tjera të procesit zgjedhor ose njoftime të tjera të parashikuara me ligj.”
Propozimet për financimet
Një tjetër risi është edhe propozimi për të shmangur fenomenin e Lezhës me PS-në dhe Beratit me PD-në ku kandidatet gra në lista hiqnin dorë nga mandati për t’ia kaluar meshkujve. Në draft PS prpozon që mandati t’i kalojë kandidatit me të njëjtën gjini në listat e partisë aleate, me herësin më të lartë. Drafti është propozuar nga PS, ndërsa opozita e ka bojkotuar Komisionin e Reformës Zgjedhore.
