Ylli Manjani ish-ministri i dorëhequr nga politika por jo nga mendimet e tij në lidhje me drejtësinë ose ligjin i cili është edhe profesioni i tij. Prej më shumë se 13 vitesh, ka ndërtuar një profil që i është afruar më shumë me atë ligjor sesa me atë politik.I pakompromis në mjaft raste me bindjet e tij edhe kur ato bien ndesh me linjën zyrtare të kujdo.
Në intervisten ekskluzive për Alpenews.al ai ka folur për reformën në drejtësi, vetingu në politikë dhe ligji për Teatrin.
1.Java që kaloi ishte një furtunë për lëvizjet e prokurorëve nga kryeprokurorja Arta Marku të cilët kishin në duart e tyre çështje shumë të rëndësishme. Si i komentoni lëvizjet e zonjës Marku?
Lëvizjet e zonjës Marku, janë fiks si “lëvizjet e zonjës Marku”! Dmth krejt inatçore, hakmarrëse dhe të pa justifikuara. Të paligjme dhe anti Kushtetese po e po. Por tashmë paligjshmeria është bërë standart… Prokuroria e Krimeve të Rënda ishte një nukës që qeveria ende nuk e kontrollonte 100%, ndaj e shkrinë. E shkrinë që të punojnë “të qetë” në koncensione, PPP e trafik droge. Mesazhi që i dhanë publikut është që nuk kanë ndërmend të luftojnë krimin e trafiqet sepse janë vetë brenda. Prokuroria duhet vetëm për fakirët dhe kundërshtarët… Ky është mesazhi! I qartë fare!
2.Partia demokratike ka marrë si iniciativë të sajën vetingun në politikë. A është i nevojshëm ky lloj vetingu?
E kam lexuar në median elektronike këtë propozim të PD dhe në parim nuk jam kundër idesë së një politike të pastër të çliruar nga krimi dhe ndikimi i tij. Pa dyshim që është i nevojshëm një vetting në politikë që të sigurojë politikën më duar të pastra. Do bëhet apo jo, dhe si do bëhet është temë tjetër. Vecanërisht ky proçesi se si do bëhet meriton pak më shumë vëmendje. Personalisht mendoj se vettingu i politikës bëhet me dy instrumente të pazëvendësueshme; së pari nga një shtet jo politik (pra nga një administratë, polici e drejtësi) krejtësisht jo politike; dhe së dyti nga zgjedhjet e ndershme. Të tjerat janë shpikje që nuk sigurojnë asgjë afatgjate. Pra thënë në konktekstin politik të ditës, politika nuk do pastrohet dot as nga Shteti- tepsi që kontrollon tërësisht Rilindja ( apo qoftë edhe në rastin sikur ta kontrollonte një koalicion, njësoj është) edhe as me komisione vetingu që ngjan si kontrolli punëtor i Enver Hoxhës. Ky modeli i kontrollit punëtor po përdoret për të shkatërruar pavarësinë e Drejtësisë… Gjithashtu nuk ka vetting ne politikë nëse deputetët i nxjerr nga dera sistemit demokratik dhe i fut nga dritarja kryetari i partisë. Prandaj duhen zgjedhje të ndershme, ku populli vendos dhe partia merr aq mandate sa i jep populli dhe jo formulat.
3.Në rast se ky veting miratohet. Po familjarët e tyre a duhet të jenë pjesë e kësaj “site”?
Sic ju thashe, nuk besoj ne skema esktra ligjore dhe ekstra shtetërore. Besoj tek shteti jo politik. Që do të thotë, kush ka hesape për të larë më ligjin duhet ti lajë në gjykatë dhe jo në veting. Se nuk ka kuptim që të dënohesh pse pi kafe me dikë dhe ti shpëtosh dënimit kur ndan pare me po këtë person!!!
4.Ligji për Teatrin u kthye në një luftë politike ku secila palë ja hedh fajin njëra tjetrës. A duhet të prishet “Teatri”?
Ligji për Teatrin ka nxjerrë jashtë lojë Kushtetutën dhe kuadrin normativ të Shtetit. Ky është thelbi i kësaj çështje. Dmth nuk ka asnjë rrjesht në atë ligj të ketë lidhje me sistemin kushtetues dhe me normat e shtetit. Nëse kjo bëhet dhe në politikë nuk është blasfemi. Sa më takon jam me cilindo grup politik që ndalon veprimit e pushtetit jashtë normave ligjore dhe kushtetuese. Mbështes gjithashtu edhe idenë që nëse pushteti e çon deri në fund këtë marrëzi, dinamiti ndaj kullave është përgjigja proporcionale. Them proporcionale jo për hakmarrje por për drejtësi. Teatri është pjesë e identitetin tonë kombëtar dhe kjo nuk është punë nostalgjie (sic thotë Rama) por detyrim konstitucional për ta ruajtur. Identiteti jonë nuk mund të zëvendësohet as me kulla e as me drogë. Në këtë pikë më mirë nostaligjik por me identitet kulturo e historik sesa modern dhe drogaxhi.
Përgatiti: AlpeNews.al
