Kur jeton gjatë me një njeri, ndodh të harrosh t’i shprehësh ndjenjat, apo t’i vësh në pah vlerat. Përjashtim nuk ka bërë as kompozitori i ndjerë Aleksandër Lalo dhe bashkëshortja e tij, që i ka rrëfyer regjisorit Leonard Bombaj pengun më të madh pas vdekjes së Lalos më 19 nëntor.
“Sa peng e kam, çdo ditë më thoshte të dua dhe unë s’ja thoja dot,” ka cituar Bombaj fjalët e saj, që tani që s’e ka më pranë shokun e jetës e ndjen edhe më të fortë dashurinë që s’pati guximin t’ja shprehë.
“Alda, nuk do jemi përjetësisht,” iu drejtua me humor Leonardi bashkëshortes së tij që ishtë gjithashtu e pranishme në studion e Rudinës dhe përfitoi të thoshte dy fjalë për Nardin, që në përditshmëri mbase harron t’ja thotë.
“Kur jetoni shumë vite bashkë, nuk ia ve në dukje shpesh vlerat personit që ke në krah. Ne përsosim çdo ditë njëri-tjetrin, Nardi ka tolerancë të jashtëzakonshme, bonsens dhe qetësi që unë mund ta kem humbur me kalimin e viteve. Ajo që kemi mësuar të dy ndër vite është optimizmi. Gota duhet parë gjysmë plot. Bashkëjetesa kjo është, kur ti je në momente të vështira, tjetri të ngre,” përfundoi ajo fjalët e saj, që siç vetë Bombaj tha, nuk i ka dëgjuar më parë.
