Kryetari i PD, Lulzim Basha është ngatërruar teksa llogariste disa shifra për tre projektet e inceneratorëve për të cilët, sipas tij, qeveria do paguajë 400 milionë euro, ndërsa përfituesi është një person i vetëm.
Duke llogaritur shifrat, Basha bëri një lapsus kur iu desh të shumëzonte 7 x 7, kur tha se bëjnë 42, në vend të 49. “Për 7 vjet, nga 7 milionë dollarë, 7 x 7 janë 42”, tha Basha, ndërsa salla e Kuvendit u përfshi nga të qeshurat. Por kreu i PD u ngatërrua edhe në mbledhjen e shumave. “49 + 36 bëjnë 95”, tha Basha, në një kohë kur bëjnë 85. Deputetët e PS u përfshinë nga të qeshurat ndërsa Basha u ndje jo pak në siklet. “U shkritë ju, u shkritë, se për ju janë patate këto”, iu drejtua Basha deputetëve të PS të cilët qeshnin.
Por kjo nuk është e gjitha. Pasi ka ditë të tëra që akuzon se janë 400 mln euro të cilat qeveria do ua japë privatëve për ndërtimin e inceneratorëve, kur në fakt, sipas shifrave të Bashës, dolën se ishin 350 milionë euro. Nga ana tjetër, kryeminsitri Rama tha se tre projektet, në Vlorë, Fier dhe Elbasan, për tratjimin e mbetjeve kushtojnë 56 mln euro.
