Si pasojë e motit të keq me erëra të forta dhe reshje të dendura shiu do të vazhdojë pezullimi i trafikut detar për çdo mjet lundrues.
Kapiteneria në Vlorë ka pezulluar çdo lundrimin në det të hapur. Ndërkohë, edhe në portin e Sarandës dhe atij të Durrësit është pezulluar lëvizja. Janë pezulluar të gjitha udhëtimet e linjës së trageteve Sarandë-Korfuz dhe anasjelltas për shkak të valëzimit në det që shkon në 5-6 ballë juglindje.
Po ashtu, Durrësi është përfshirë nga një mot i pazakontë, që në orët e para të mëngjesit ku ka nisur një shi i shoqëruar me erëra të forta dhe ka shkaktuar probleme në të gjithë qytetin dhe në port. Në portin e Durrësit është pezulluar aktiviteti në sektorin e ngarkim-shkarkimit.
Kapiteni i përgjithshëm kapitanerive ka urdhëruar pezullimin e anijeve të tonazhit të ulet e të mesëm, si dhe pezullimin deri në një urdhër të dyte të të gjithë sektorit të peshkimit në vend. Tragetet e linjës Durrës-Bari, Durrës -Ankona priten të mbërrijnë nga gjashtë shtatë orë vonesë.
Nga ana e saj, OSHEE ka marrë masat të jetë në dispozicion të situatës së krijuar, duke lënë kështu në terren rreth 600 punonjës. /AlpeNews.al/
