Kryetari i veteranëve të UCK’së, Hysni Gucati, në emisionin Frontal të Televizionit 7 ka folur për protestën e djeshme të organizuar në Drenicë për të mos i lejuar hyrjen në këtë rajon presidentit serb, Aleksander Vuçiç. Sipas prijësit të veteranëve të UCK’së, Vuçiç do ta pësonte keq nëse do të hynte dje në Skenderaj.
Gucati ka thënë se nëse do të realizohej vizita e Vuçiçit në Banjë të Skenderajt, presidenti serb nuk do të shpëtonte lehtë, transmeton Gazeta Express.
“Marsi i 98’ës do të përsëritej. Nëse do të hynte dje Vuçiçi Drenica prapë do të dëshmonte vetën”
Gucati, i pyetur se si do të ndalej Vuçiç, ka thënë se edhe do ta gjuanin, dhe jo me ngjyrë të kuqe.
Tutje kryetari i veteranëve ka thënë se presidentin serb e konsideron kriminel dhe se atij nuk duhet i’i lejohet hyrja pa kërkuar falje.
“Vuçiç është një kriminel për ne. Plus në deklaratën e tij në Mitrovicë, ai e përkrahi Millosheviqin”, ka thënë Gucati.
