Presidenti Hashim Thaçi, ka thënë sot se një marrëveshje ndërmjet Kosovës dhe Serbisë do t’i hapte rrugët e Kosovës drejt integrimit Evropian.
“Një marrëveshje ligjërisht e obligueshme ndërmjet Kosovës dhe Serbisë hap rrugën e njohjes së Kosovës nga pesë shtete të Evropës, dhe integrim në NATO dhe Kombe të Bashkuara”, është shprehur ai në një tryezë të organizuar nga KDI.
Thaçi thotë se janë shumë larg arritjes së një marrëveshje, por megjithatë ai shprehet se është i vendosur që një marrëveshje të arrihet.
“Jemi shumë larg marrëveshjes. Jam skeptik që mund të arrihet marrëveshja. Por jam i vendosur që të arrihet”, ka deklaruar presidenti i Kosovës.
Sipas tij, duhet pasur frikë nëse nuk arrihet një marrëveshje me Serbinë.
“Askush nuk duhet të frikësohet nga arritja e marrëveshjes së Kosovës dhe Serbisë, duhet të frikësohemi nëse nuk arrihet një marrëveshje me Serbinë”, ka thënë ndër të tjera Thaçi.
Kujtojmë se Thaçi dhe Vuçiç kanë qenë të vetmit të cilët e kanë shtyrë përpara idenë e ndryshimit të kufijve, si zgjidhje përfundimtare ndërmjet Kosovë dhe Serbisë.
