Tashmë që jeni nëna e një fëmije të vogël edhe pse mund të tregoheni të kujdesshme kjo nuk do të thotë që s’mund të sëmureni. Por a mund ta ushqeni vogëlushin tuaj me gji nëse jeni të sëmura? Mjekët në shumicën e rasteve përgjigjen me po. Nëse keni një të ftohje të thjeshtë, grip, një virus në stomak madje dhe ethe, nuk ka problem nëse e ushqeni bebin tuaj me gji. Në fakt me siguri ju e keni ekspozuar bebin ndaj sëmundjes edhe përpara se të shfaqeshin simptomat. Dhe meqë trupi juaj po e sulmon këtë sëmundje nëpërmjet antitrupave që prodhon, ju do t’i kaloni këto antitrupa dhe tek bebi juaj me anë të qumëshit të gjirit dhe kështu sistemi i tij imunitar do të forcohet.
Nëse keni ethe për më shumë se 3 ditë, është mirë që të bëni një vizitë te doktori në mënyrë që të merrni një kurë të saktë për problemin konkret që keni. Nëse doktori zbulon se keni një infeksion bakterial që kërkon antibiotik, mos harroni t’i kujtoni se jeni duke ushqyer fëmijën me gji dhe sigurohuni që doktori t’ju rekomandojë një antibiotik që mund të merret edhe gjatë gjidhënies.
Nëse zgjidhja juaj e vetme është përdorimi i medikamenteve që nuk mund të merren gjatë gjidhënies, atëherë ju mbetet veçse ta pomponi dhe më pas ta hidhni qumështin gjatë kohës që jeni duke i konsumuar ato medikamente. Në këtë mënyrë pas përfundimit të kurës ju do të keni qumësht mjaftueshëm për bebin. Ndërkohë mund ta ushqeni bebin me qumësht formule apo me qumësht gjiri të cilin e keni pompuar përpara përdorimit të medikamenteve.
Mos harroni që të pini sa më shumë lëngjë kur jeni të sëmura. Sa më e hidratuar të jeni aq më e madhe do të jetë sasia e qumëshit që do të prodhoni. Dhe gjithmonë i lani duart përpara se ta prekni bebin dhe ta ushqeni atë.
