Administratori i një pike këmbimi valutor në Cërrik është grabitur mëngjesin e sotëm nga një person i armatosur.
Kur A. Ngjela, ka dalë nga mjeti, i janë grabitur paratë nga një person ende i paidentifikuar nën kërcënimin e armës.
Ngjela ka thënë në polici se kishte 14 milionë lekë në makinë.
Ai ka deklaruar se po shkonte tek biznesi i tij në Elbasan, dhe se paratë ishin në kroskotin e makinës.
Mësohet se policia po punon për identifikimin dhe kapjen e autorit, i cili është larguar me shpejtësi nga vendngjarja.
Njoftimi i Policisë së Elbasanit:
Në lagjen nr.1, Cërrik , rreth orës 06.40 minuta, shtetasi A. N., 51 vjeç, deklaron se në momentin që ka futur lekët në makinë, në afërsi të mjetit një person i pa maskuar dhe me një armë dyshohet pistoletë i ka kërkuar lekët, ku dhe i ka marrë. Menjëherë në vendngjarje ka shkuar grupi hetimor ku po punon për sqarimin e rrethanave të ngjarjes, identifikimin dhe kapjen e autorit.
