Kryeministri Edi Rama u shpreh sot se, ky ka qenë sezoni i parë turistik kur në plazhin e Durrësit nuk kemi pasur derdhje të ujërave të zeza si rrjedhojë e investimit në sistemin e ujësellës-kanalizimeve.
Në një takim me kryetarët e bashkive dhe prefektët për turizmin, Rama tha se, “jemi shumë të vetëdijshëm për mangësitë, ende jo të vogla të infrastrukturës, të sistemeve të furnizimit me ujë të pijshëm, por edhe nga kjo pikëpamje kemi pasur sezonin më të mirë turistik. Kemi pasur sezonin e parë kur në plazhin e Durrësit nuk kemi pasur derdhje të ujërave të zeza si rrjedhojë e investimit në sistemin e ujësellës-kanalizimeve”.
Ndërkohë Kryeministri theksoi se ka ende situata të patolerueshme sa i takon zaptimit të rërës.
“Në Lezhë rërës i ka dalë pronari. Ministri i Turizmit është i ngarkuar të bëjë një padi penale të përgjithshme për ta çliruar rërën. Por kemi edhe hapësira të tjera ku rëra është privatizuar. Duhet të kemi një plan transparent. Ndarje të qartë të zonave private, publike dhe vetë zonave private nga njëra-tjetra”, tha Rama.
Kryeministri nënvizoi se, “e dimë sesi ka qenë dhe përmirësimin që është bërë, por është e rëndësishme të themi se sa mirë mund të jetë akoma situata në krahasim me sa është”
Ai i ftoi kryetarët ë bashkive të bëjnë reflektimet e tyre në lidhje me sezonin. Të nxjerrin konkluzionet sepse ata janë në terren përditë.
“Në sezonin e ardhshëm janë zgjedhjet. Shumë nga ju mund të jenë në fushatë, disa jo. Por përgatitja e sezonit duhet të fillojë sa më parë. Dua t’ju siguroj të gjithëve pa përjashtim se jemi në dispozicion dhe ajo që duam të bëjmë është të bëjmë maksimumim për turizmin që është majft i rëndësishëm”, tha Rama.