Negociatori kryesor i Brexit në Bashkimin Europian, Michel Barnier, tha se Europa duhet të përgatitet për rastin e daljes së Britanisë pa arritur një marrëveshje, pavarësisht se objektivi është “divorci” i rregullt mes dy palëve.
Ai tha se çështja e kufirit me Irlandën Veriore është një nga pikat më të vështira të negociatave.
Më herët gjatë javës, Barnier tha se Bashkimi Europian është i përgatitur që t’i ofrojë Britanisë një marrëdhënie tejet të afërt pasi të dalë, megjithatë, pa cënuar tregun e përbashkët të Europës. Ndërkohë që vetëm 7 muaj kanë mbetur nga dalja zyrtare e Britanisë nga Bashkimi Europian, të dyja palët nuk kanë arritur ende një dakordësi mbi shkëputjen.
Politikëbërësit presin që afati jo-zyrtar i Tetorit për të arritur një marrëveshje, të shtyhet deri në Nëntor. Ministri britanik për Brexit, Dominic Raab, tha se ka besim që do të arrihet një dakordësi mes dy palëve, megjithatë, shtoi se afati i Tetorit mund të neglizhohet.
