Policia australiane ka parandaluar një sulm terrorist që do të godiste Melburnin gjatë festimeve për Vitin e Ri.
Një 20-vjeçar u vu në pranga e do të akuzohet për terrorizëm. Autoritetet pretendojnë se i riu kishte planifikuar të qëllonte me armë zjarri persona të rastësishëm, në sheshin e federatës në qendër të qytetit.
Policia siguron qytetarët se nuk ka të dyshuar të tjerë që mund të kërcënojnë sigurinë publike. Siç mësohet, i riu që ka lindur në Australi nga prindër somalezë, kishte blerë një armë automatike para arrestimit në periferi të Melburnit.
Ai kishte qenë në monitorim të policisë, që prej muajit janar. Autoritetet thonë se 20-vjeçari kishte siguruar një manual të Al-Kaedës në internet, me udhëzime për kryerjen e një sulmi terrorist dhe ishte simpatizant i të ashtuquajturit “Shteti Islamik”.
Apartamenti, biznesi ku punonte dhe prona e një të afërmi të tij u bastisën nga hetuesit. Edhe vitin e kaluar Policia tha se kishte parandaluar një sulm terrorist në ditën e Krishtlindjeve në Melburn.
