Tërmeti prej 6 ballësh i dates 11 gusht të këtij viti, ishte më i forti gjatë muajve të fundit. Epiqendra e tij ishte 9 kilometra nga qyteti i Burrelit, saktësisht në fshatin Macukull, dhe 37 kilometra nga Tirana.
Sipas emergjencave, plot 215 banesa u dëmtuan nga lëkundjet.
Pas inspektimeve nga Drejtori i Emergjencave Civile, Haki Çako, ai tha se: “ Ka dëmtime të konsiderueshme në banesa. Në Mat janë 90 banesa të dëmtuara pjesërisht , 4 banesa plotësisht të pabanueshme. Në Bulqizë janë dëmtuar 47 banesam, në Klos 36 banesa dhe në Mirditë janë dëmtuar 38 banesa”.
Po ashtu ai nënvizoi se janë angazhuar të gjitha strukturat për ti ardhur në ndihmë banorëve të prekur nga tërmeti.
Por, në zonat e prekura nga këto lëkundje të Qarkut të Dibrës, a kishte familje të cilat marrin përkrahje ekonomike nga ana e shtetit?
Për të mësuar rreth kësaj çeshtje, redaksia e ALPENews.al kontaktoi me punonjësit e Shërbimit Social Shtetëror (SHSSH), të katër bashkive të këtij qaku.
Albana Ndreu, Koordinatore e Shërbimeve Sociale në Bashkinë e Burrelit, tha për ALPENews.al se grupet janë ende në terren, për të bërë identifikimin e këtyre familjeve, dhe më tej kalimin e listave në sistem. Nga informacionet paraprake mësohet se në 4 njësi të kësaj bashkie, janë prekur 70 familje të cilat marrin përkrahje ekonomike nga ana e shtetit.
Për të vazhduar me qytetin e Bulqizës, Drejtori i Shërbimit Social, Haxhi Pulja tha për ALPENews.al se dhe në këtë qytet vazhdon puna për inspektimin dhe identifikimin nga ana e grupeve përkatëse.
Përsa i përket qytetit të Dibrës, Klevis Salkurti, Përgjegjësi i Sektorit Social, tha se fshati i Zall-Dardhës ishte më i prekuri me 18 familje të cilat trajtohen me ndihme sociale nga ana e shtetit.
E ndërsa në Bashkinë e Klosit, Mehmet Limani tha se banesat e prekura janë plot 156 të tilla, ku 72 prej tyre janë familje të cilat marrin përkrahje ekonomike nga shteti, dhe 2 nga të cilat kanë persona me aftësi të kufizuara. Në baze të njësive administrative të kësaj bashkie, më i prekur ishte vetë qyteti i Klosit, për të vazhduar me njësitë administrative Suç, Xibër dhe Gurrë.
Përgatiti: AlpeNews.al