Policia Bashkiake e Tiranës ka vendosur në total 10.655 gjoba në të gjitha njësitë administrative të kryeqytetit, në gjysmën e parë të vitit ndaj qytetarëve që kanë shkelur ligjin dhe kanë dhunuar hapësirat publike.
Referuar të dhënave zyrtare të bëra publike nga Bashkia e kryeqytetit, gjobat janë vendosur për shkelje të ndryshme si zënie të hapësirave publike; aktivitet pa leje; ndotje mjedisi; prishje të qetësisë publike; shpërdorim i ujit të pijshëm; mungesë dokumentacioni, si dhe gjoba të natyrave të tjera. Por po të përfshijmë këtu edhe gjobat e qarkullimit rrugor, të cilat nuk janë marrë në analizë, numri i shkeljeve është shumë më i lartë.
Por kush është njësia me perfomancën më të keqe në këtë drejtim dhe që ka marrë numrin më të lartë të gjobave? Duke analizuar të dhënat e Policisë Bashkiake për çdo njësi, vihet re se njësia administrative më problematike është ajo nr.5, ose siç njihet ndryshe “zemra e Tiranës”, pasi përfshin zonën e Bllokut dhe Tiranën e Re, si dhe është njësia me numrin më të lartë të popullsisë. Në këtë njësi janë vendosur në total 1265 gjoba, e ndjekur nga njësia nr. 2 që përfshin zonën e Tregut Elektrik e deri në Sauk, me 1199 gjoba dhe e treta renditet Lapraka, apo njësia nr.11 me 1115 gjoba.
Nga njësitë e vjetra të kryeqytetit më pak shkelje e si rrjedhim dhe masa administrative janë regjistruar në njësinë nr.1 që përfshinë Rrugën e Elbasanit, Shkollën e Baletit, ku janë vendosur 424 masa administrative etj. Ndërsa ish komunat që i janë bashkuar Tiranës kanë një numër shumë më të ulët shkeljesh.
Gjobat për njësi
- Njësia nr.5 1265 gjoba
- Njësia nr.2 1199 gjoba
- Njësia nr.11 1115 gjoba
- Njesia nr.8 1112 gjoba
- Njësia nr.3 999 gjoba
- Njësia nr.6 960 gjoba
- Njësia nr.4 867 gjoba
- Njësia nr.7 853 gjoba
- Njësia nr.9 642 gjoba
- Njësia nr.10 592 gjoba
- Njësia nr .1 424 gjoba
- Njësia Kashar 387 gjoba
- Njësia Farkë 113 gjoba
- Njësia Dajt 64 gjoba
- Njësia Baldushk 55 gjoba
- Njësia Vaqarr 8 gjoba
- GJITHSEJ:10.655 GJOBA
