Arkivi Qendror Shtetëror i Filmit ka rikthyer për publikun kinemanë e viteve ’90.
Një krijimtari e realizuar ato vite në filmat artistikë dhe ata dokumentarë janë bërë pjesë e një programi, që ka nisur gjatë stinës së verës për publikun.
Filmat shfaqen këtë herë jo në sallë kinemaje, por në tarracën e Pallatit të Kulturës.
Programi veror “Kinematografia e viteve ’90” organizuar nga AQSHF dhe Tulla Culture Center, vijon në mbrëmjen e datës 14 gusht me ”Dasmën e Sakos”.
Ngjarjet e Dasmës së Sakos vijnë përmes mjegullash mesjetare në një qytet fantazmagorik. Nën çatitë e gurta dhe muret kështjellore, ndodhin drama të mëdha. Një përzjerje urrejtjesh me dashuritë, vdekjesh me ripërtëritje.
Shpërdorimi i pushtetit ka thelb të njëjtë por shfaqje të ndryshme. Dhe aspirata e vetme e njeriut është liria dhe një jetë me dinjitet të vërtetë njerëzor.
Aktorët që interpretojnë janë Ndriçim Xhepa, Xhevdet Feri, Elvira Diamanti, Agim Qirjaqi, Tinka Kurti, Alber Veria, Neritan Licaj, Artur Gorishti, Vasjan Lami, etj.