Asnjë prerje flokësh nuk ka qenë kaq gjatë trendi i kësaj dekade, sa prerja lob- long bob- ose thënë ndryshe, prerje e drejtë në gjatësi mesatare. Arsyeja? Shumica prej nesh duam edhe të kemi gjatësi flokësh, edhe prerje moderne.
Në 2007-ën, Rihanna me “Umbrella” përcaktoi trendin e dekadës së shkuar: Prerjen shkurt dhe drejt, të quajtur bob.
Ndërsa ky trend s’bëhet ndonjëherë demode për të famshmit, shumica e vajzave që s’duan t’i presin flokët aq shumë, zgjedhin variantin më të gjatë të bobit: lob. Me gjatësi mbi supe apo deri tek supet, kjo prerje është përhapur më shpejt se zjarri.
Lobi është perfekt për të rigjeneruar flokët
Lori Hoxha i kishte flokët më të gjatë përpara se edhe ajo t’i priste në këtë model. Pas një kohe të gjatë me flokë bjonde platin dhe pas një eksperimenti në SHBA, flokët kishin nevojë për një periudhë pushimi; ajo realizoi prerjen lob.
Duke hequr majat e holla dhe të dëmtuara, që ne zakonisht na bëhen si “bishta”, kjo prerje e lejon flokun të marrë frymë.
Lobi s’t’i pret shpresat për t’i rritur prapë
Nuk është një shkurtim drastik dhe mund t’i kthesh në gjatësinë e mëparshme për një vit. Pastaj nëse të fiksohet se duhet të shkosh patjetër me flokë të gjatë në atë party, ke ende gjatësi për të vënë shtesa flokësh.
Lobi është klas i gjallë
Gjatësia e mesme, prerja e drejtë, pa ekstravaganca të tepërta; është një prerje që në thelb ka finesën.
Lobi u shkon të gjithëve
Jo të gjithëve na përshtaten flokët e shkurtër dhe jo të gjithë duam flokë të gjatë, prandaj lobi është përhapur kaq shumë; është një e ndërmjetme e artë.
Me lobin dukesh gjithmonë cool
Kur do të dukesh e thjeshtë, mund t’i mbash flokët të krehur drejt.
Por nëse do të dukesh cool, mund t’i modelosh me onde pa u dukur si nuse. Çfarëdo që t’i bësh, nuk ngjan e sajuar!
S’ke nevojë të rrish e krehur!
Prerja e drejtë i shtyn flokët të rrinë drejtë- sikurse shkallëzimi stimulon kaçurelat. Përveç kësaj, në gjatësinë e lobit nuk janë krijuar akoma ondet e çrregullta që zakonisht duam t’i zhdukim.
anabel.al
