Politika dhe sjellja e politikaneve shqiptare dhe me gjere ka qene ne rend te dites, dhe ne nje diskutim ku ish presidenti Moisiu ka qene me i ashper se kurre, duke i cilesuar deputetet mashtrues dhe mjeshtra te mashtrimit.
Ish-drejtues të lartë të shtetit, ambasadorë të paqes, politikanë nga Shqipëria dhe Kosova janë bërë bashkë dje në Tiranë për iniciativën ndërkombëtare të parlamentarëve për paqe.
Në këtë konferencë ka marrë pjesë dhe ish-Presidenti Alfred Moisiu, i cili njëkohësisht është dhe anëtar i Këshillit Global për Paqen.
Gjatë fjalës së tij ish-kreu i shtetit Alfred Moisiu lëshoi mesazhe të forta për parlamentarët shqiptarë duke kërkuar që ata të jenë avokat të paqes dhe të drejtësisë për njerëzit që përfaqësojnë.
Madje, Moisiu theksoi se qytetarët kanë humbur besimin dhe po vazhdojnë ta humbasin atë kundrejt deputetëve për shkak se sipas tij deputetët nuk po mbajnë premtimet e tyre ndaj qytetarëve.
“Qytetarët e kanë humbur besimin dhe fatkeqësisht po vazhdojnë ta humbasin edhe më tej, te të zgjedhurit e tyre.
Deputeti duhet të mbaj komunikim të vazhdueshëm me qytetarët që përfaqëson, të njoh problemet kryesore dhe të dialogojë me ta edhe kur nuk mund t’i zgjidh ato probleme që ngrihen, por të mos mbetet vetëm te premtimet që bëhen në kohë zgjedhjesh për të cilat vërtetë janë bërë mjeshtër të gjithë”, u shpreh ish-Presidenti Alfred Moisiu.
Për ish-kreun të Shtetit, iniciativa për të krijuar një rrjet parlamentarësh për paqen dhe në Ballkan, është domosdoshmëri për zgjidhjen e çështjeve të mbetura pezull në rajon, pasi sipas tij shovinizmi dhe nacionalizmi janë ende gjallë.
“Shovinizmi dhe nacionalizmi ende janë gjallë për fat të keq. Niveli i pamjaftueshëm kulturor dhe ekonomik është një shtrat i mirë për këto dy ideologji”, u shpreh ish-kreu i shtetit Alfred Moisiu.
Ndërkohë në konferencë kanë marrë pjesë personalitete të ndryshme nga skena botërore e politikës, si presidenti i Federatës Universale të Paqes për Europën, Euroazinë dhe Lindjen e Mesme, Kastumi Otsuka dhe ish-kryeparlamentarja e Luxemburgut, Erna Henikot, të cilët theksuan se tani është koha e bashkëpunimit me të gjitha vendet për paqen në botë./TemA/