Nuk ka më justifikime, Montella thotë se është koha që Milani të rikthehet në vazhdimësi te rezultatet pozitive në Serie A.
Milani mposhti Austrinë e Vjenës me rezultatin e thellë 5-1 dhe siguroi kualifikimin për në fazën e 1/16-ave të Europa Leagues, por në kampionat nuk po kalon një periudhë aspak të mirë.
Në 13 takime, kuqezinjtë kanë fituar 6, barazuar 1 dhe humbur 6 të tjera, teksa e shohin veten plot 11 pikë larg zonës Champions (që mund të bëhet edhe më tepër, pasi Roma ka luajtur një ndeshje më pak).
Pasditen e të dielës, kuqezinjtë do të presin në “San Siro”, Torinon, një skuadër që ka vetëm një pikë më pak se Milani dhe që ka elementë të aftë për të bërë keq.
Gjithsesi trajneri Vincenzo Montella nuk kërkon justifikime dhe alibi, teksa kërkon që skuadra të gjejë një vazhdimësi fitoresh.
“Kalendari i favorshëm? Pasi siguruam kualifikimin në Europa League, tani mund të përqendrohemi vetëm te kampionati. Duhet të rikthehemi te fitoret, pasi nuk kemi më asnjë alibi. Besoj te skuadra, që ka treguar një nivel në rritje loje, nga ndeshja në ndeshje, ndërsa tani ka ardhur koha që të grumbullojmë edhe pikë”, tha ai.
“Sulmi me 2 ‘Pyka’? Po, është një mundësi. Në Europa League ka funksionuar mirë, por Suso nuk mund të bëjë trekuartistin, ndaj duhet interpretim i mirë edhe nga 8 lojtarët e tjerë”, shtoi Montella.
“Andre Silva apo Kaliniç? Portugezi, ashtu si Cutrone, është i ri, me entuziazëm, energji dhe dëshirë për të bërë mirë, ndërsa Kaliniç është më specialist, për disa lloj ndeshjesh. Gjithsesi, ndoshta luajnë të 2”.
“Autogoli i Bonuccit? Ndaj austriakëve ka bërë një punë të shkëlqyer në fazën defensive dhe në orientimin e repartit. I vetmi gabim ishte ai i autogolit, ku në fakt rrëshqiti dhe nuk mundi të largojë topin. Gjithsesi, nëse arrijmë t fitojmë 5-1 më pas, do të thotë që të gjithë kanë meritat e tyre. Bonucci është një prej mbrojtësve më të mirë në qarkullim dhe jemi të lumtur që e kemi në ekip”, theksoi mes tjerash Montella.
