U miratua dje në Kuvend, me 76 vota pro projekt-rezoluta “Për Reformën e Politikës Shtetërore për Diasporën”
“Diaspora është pasuria kombëtare e Shqipërisë. Kuvendi i Shqipërisë është i përkushtuar që kjo të kthehet në një realitet të prekshëm nga qytetarët që kanë votuar apo që do të votojnë nesër për të ardhmen e përbashkët.”- është ky zotimi i Kuvendit të Shqipërisë shkruar në rezolutën e miratuar dje me votën e vetëm deputetëve të mazhorancës
Nëpërmjet rezolutës së miratuar Kuvendi i Shqipërisë kërkon:
Zgjidhjen e së drejtës së votës për shtetasit shqiptarë jashtë vendit me mekanizma ligjore nga Komisioni i Reformës Zgjedhore, në bashkëpunim me OSBE-ODHIR.
Në 8 pikat e paraqitura në rezolutë Kuvendi i Shqipërisë kërkon gjithashtu koordinimin me institucionet përgjegjëse në fushën e diasporës të shtetit të Kosovës për hedhjen e hapave të përbashkët, në një marrëdhënie ku është e rëndësishëm edhe bashkëpunimi me shtetet e tjera fqinje dhe rajon.
Krijimi i një programi të veçantë nga ministritë përgjegjëse për arsimin,kulturën dhe diasporën për botimet on-line në fushën e arsimit dhe librit shqip, për të cilin komisionet përgjegjëse në Kuvendin e Shqipërisë të kërkojnë informacion periodik për fazat e realizimit të tij.
Sipas rezolutës, kërkohet ndërmarrja e nismave të nevojshme nga organet kompetente për rishikimin e Ligjit “Për Shtetësinë” dhe kuadrit ligjor përkatës për t’u përgjigjur shqetësimeve të shtetasve shqiptarë jashtë vendit dhe fenomenit të “pashtetësisë”.
Ndër të tjera Kuvendi i Shqipërisë vlerëson si të nevojshme diskutimin dhe vlerësimin periodik të çështjeve që kanë të bëjnë me diasporën dhe interesat e shtetasve shqiptarë jashtë vendit.
Ai konsideron se në kushtet e reja sociale dhe procesin e integrimit në Bashkimin Europian, dallimet e shtetasve, të cilët jetojnë “jashtë” dhe “brenda” vendit, janë ngushtuar.
Ato kërkojnë përgjigje ligjore dhe administrative të duhura.
Opozita nuk e votoi edhe pse kjo ishte nje rezolute historuke per diasporen.
