Zv.kryeministri dhe ministri i Jashtëm i Kosovës, Behxhet Pacolli, ka treguar çfarë ndodhi 3 ditë më parë në avionin ku udhëtonin 4 liderët kosovarë drejt Brukselit. Në një prononcim për KTV, Pacolli ka thënë se e ka dëgjuar pilotin teksa fliste me Beogradin. Për 15 minuta, thotë Pacolli, avioni i nisur nga Prishtina ka fluturuar drejt Beogradit. Ai ka theksuar se ka nisur një hetim për ngjarjen.
Në moment unë e kam dëgjuar pilotin duke folur me Beogradin dhe në moment i kam thënë ndalu dhe kthehu prapa. Diku kemi qenë nja 15 minuta fluturim në drejtim të Beogradit. Duhet të ketë qenë një gabim dhe kam kërkuar një hetim që tashmë ka filluar. Bile bile se duhet m’u dhanë një arsyetim për kthim dhe është dashur me thanë se dikush prej pasagjerëve është sëmurë.
Behxhet Pacolli, zv/kryeministër
3 ditë më parë, avioni ku udhëtonin kryeministri Ramush Haradinaj, kreu i kuvendit të Kosovës, Kadri Veseli, ministri Behxhet Pacolli dhe Fatmir Limaj, kaloi në hapësirën ajrore të Malit të Zi, në një pjesë e cila kontrollohet nga shteti serb. Incidenti me avionin ndodhi për shkak të një gabimi teknik nga kulla ajrore e Tiranës. Albcontrol reagoi dje për çështjen dhe tha se s’kishte informacion mbi identitetin e pasagjerëve që po fluturonin në avion. Agjensia siguroi se po kryhen të gjitha veprimet për të sqaruar ngjarjen.
