Ende nuk po gjendet asnjë zgjidhje për banorët e Thethit por edhe fshatrave të tjerë në Dukagjin të cilët kanë tokat e tyre të trashëguara prej shekujsh. Problemi qëndron në faktin se ende nuk janë të pajisur me çertefikatë pronësie për shkak se shteti shqiptar nuk ia mundëson një gjë të tillë. Disa herë e kanë kërkuar por deri më tani nuk ka asnjë zgjidhje.
Banorët e Thethit kanë zhvilluar edhe disa protesta, por sërish nuk janë marrë parasysh. Janë zhvilluar disa takime sporadike mes institucioneve por sërish nuk i është dhënë rugë këtij problem për të hapur dritën jeshile për banorët e Thethit.
Në këtë mënyrë vazhdojnë procedimet e pronarëve që kanë bujtina atje dhe që bëjnë ndonjë ndërtim apo ndryshim në objektet që kanë. Kësaj here ka qenë radha e shtetasit N.B 50 vjeç, banues në fshatin Theth i cili dyshohet sipas policisë se atje ka ndërtuar një objekt pa leje ndaj edhe është proceduar në gjendje të lirë. Pronarët nga njëra anë i kërkojnë shtetit që t’i pajisë me çertefikata pronësie nga ana tjetër policia i procedon ata.
Ja njoftimi i policisë për këtë rast:
Më datë 12.07.2018, u referuan materialet në Prokurorinë pranë Gjykatës së Shkallës së Parë Shkodër, për shtetasin N.B., vjeç 50, banues në fshatin Theth, pasi dyshohet se në këtë fshat, ka ndërtuar një objekt pa leje. Neni 199/a i Kodit Penal.
