Nga Ardit Rada
Ka qenë disa herë ministër. Dikur nën Sali Berishën, më pas nën Edi Ramën. Madje me këtë të fundit kapi postin e rëndësishëm të ministrit të drejtësisë, të zyrtarit që ka në dorë ndër të tjera edhe kyçet e burgjeve të Shqipërisë. Kjo ndodhte në fillim të vitit 2017, kur emërohej ministër drejtësie. Ishte koha kur Shqipëria “u bë jeshil”, siç thotë sot e gjithë ditën LSI dhe vetë zotëria ministër.
Pse ka rëndësi viti do thoni ju?! Ka si s’ka, sepse sot, një vit e gjysëm më pas dhe kur është përfaqësues i lartë i opozitës, Petrit Vasili shkruan në rrjetet sociale se habitet me raportin e autoriteteve italiane për drogën shqiptare.
“Raporti tronditës i Drejtorisë së Antidrogës Italiane, demaskon përfundimisht qeverinë shqiptare dhe ndëkombëtarët që heshten. Raporti i Drejtorisë Qendrore të Antidrogës Italiane, paraqet situatën tronditëse lidhur me drogën, një situatë kjo e paprecedentë në historinë e pluralizmit shqiptar për nga përmasat, infiltrimi dhe përfshirja e qeverisë”, shkruan zoti Vasili.
Pra, autoritetet italiane kanë prodhuar shifra tronditëse për shtrirjen e fenomenit të drogës…në kohën që Petrit Vasili ishte ministër drejtësie!!! Petrit Vasili na thotë sot ne shqiptarëve se ka mësuar me një vit e gjysëm vonesë, se paskesh qenë në mes të plantacionit të kanabisit, pa ditur asgjë, ose, nëse ka ditur eventualisht diçka, pa nxjerrë asnjë zanore nga goja, për katrahurën e hashashit që e rrethonte. Këto janë dy mundësitë e vetme teorike për ish-ministrin, por asnjera prej tyre nuk i bën nder.
Ndjenja e protestës që kultivon sot LSI ndaj fenomenit të drogës, pasi ka qenë katër vjet në postet më të larta të shtetit shqiptar (Parlament, qeveri e një dyzinë agjencish qeveritare), shënon një akt të shëmtuar kamaleonizmi politik të një partie, që ka shetitur nëpër të gjithë spektrin politik shqiptar në dy dekadat e fundit, pa i hyrë asnjë gjemb në këmbë. Kur Petrit Vasili tronditet sot si qytetar i thjeshtë, për bëmat e kohës kur ka qenë i ulur në rreshtin e parë të qeverisë, kjo është “t’ja bësh bam”, siç thoshte dikur i madhi Roland Trebicka. Ministri i “drogështetit”, siç e quan vetë institucionin ku firmoste në bordero, habitet sot për drogën e mbjellë në periudhën kur ishte anëtar qeverie! Hapu dhè!
