Aktori i mirënjohur i humorit Julian Deda i ka bërë dje thirrje qytetarëve që të marrin pjesë në marshimin që zhvillohet sot kundër prishjes së Teatrit Kombëtar.
Por gjatë bisedës në emisionin “Rreze Dielli”, Deda u shpreh se do të preferonte masa pak më radikale se sa një marshim apo protestë normale, pasi sipas tij kjo është mënyra për të reaguar nga një pushteti arrogant.
Nesër (të enjten) kemi një marshim për çështjen e teatrit. Në orën 6 e 30 mblidhemi para teatrit për të marshuar drejt kryeministrisë dhe drejt Presidencës si shenjë proteste. Unë jam për masa pak më radikale se sa thjesht një protestë normale. Se çfarë këto mund të diskutohen, por jo për të thyer xhama. Jam sepse s ii themi ne “Kështu i do mushka drutë”. Nuk e do qetë dhe në mënyrë qytetare , por do masa më të forta për tia arritur qëllimit
Deda i është bashkangjitur grupit të aktorëve që protestojnë tashmë prej disa javësh projektin që parashikon shembjen e Teatrit Kombëtar dhe ndërtimin e një të riu.
Ligji që i hap rrugën këtij procesi u miratua në parlament të enjten e kaluar pavarësisht kundërshtimit në seancë edhe të opozitës.
Protestuesit do të marshojnë sot në orën 18.30 drejt Kryeministrisë e më pas drejt Presidencës për ti kërkuar në këtë mënyrë Presidentit të Republikës të mos dekretojë këtë ligj. Deri tani aktorët kanë mbledhur mbi 5 mijë firma kundër shembjes nga qytetarë të thjeshtë por edhe shumë përfaqësues të komunitetit të artit, përfshirë regjisorë, aktorë, skenaristë.
