Pasi opozita depozitoi një kallëzim penal në prokurori për kryeministrin Edi Rama me pretendimin se ky i fundit ka fshehur provat për audio-përgjimin ku implikohet vëllai i Xhafajt, vjen reagimi nga deputeti Pjerin Ndreu.
Deputeti socialist i Lezhës tha se audio-përgjimi është mashtrim. Ai tha mes të tjerash se audio-përgjimi është sekuestruar nga prokuroria dhe është çuar për ekspertizë jashtë shtetit. Mes të tjerash ai tha se historia e ‘Babales’ është qesharake për një parti që pretendon të vijë në pushtet, siç është PD.
Teksa u ndal tek reforma në drejtësi Ndreu tha se do të ketë edhe nga radhët e maxhoranës që do të ngelen në rrjetë. “Ne jemi këtu në Shqipëri dhe po përballemi me këto retorika. Mos të fshihemi pas gishtit. Reforma në drejtësi është investim antikorrupsion. Është një proces që po ecën me ritme të avashta, por po ecën. Do ketë edhe nga mazhoranca që do të ngelin për rrjetën e hetimit”, tha socialisti.
Po ashtu Pjerin Ndreu u ndal edhe tek Kodi Rrugor, që do të pësojë ndryshime sa i takon penalizimit të drejtuesve të mjeteve, që ndëshkohen duke iu hequr patentat.
“Propozimi erdhi pas një problematike që unë e kam hasur edhe gjatë ushtrimit të detyrës si deputet. Në zonë n e Lezhës, për arsye se pesha e emigrantëve nga Lezha jashtë dhe numri i kosovarëve që vijnë në Milot dhe frekuentojnë plazhet e Shëngjinit është i lartë.
Ndaj çfarë ndodh? Ka pasur emigrantet që u është marrë patenta dhe kanë qarë me lot në sy. Ne duhet ti kalojmë në këtë sorollatjen e tmerrshme. Ne i kemi lënë një alternativë që të paguajë dyfishin e gjobës për ata emigrantë që duan të marrin patentat e tyre. Kam një vit deputet në Lezhë dhe e kam konstatuar këtë problem dhe kam ndërhyrë. Kam ndjerë përkrahjen e Komisionit të Sigurisë.
Ka edhe modifikime për këtë projektligj. Nëse do ta marrim gjobën nga 50 mijë lekë të vjetra, kjo është e papërfillshme. Kjo është një masë lehtësuese, pagesa dyfish, që të marrin patentat. Disa që merren me komente dhe hedhin vrer në ‘Facebok’. Janë rreth 600 raste në vit dhe paguhen 50 mijë lekë. Këto janë të papërfillshme. E kaluam ligjin në komisionin e Sigurisë dhe pritet të kalojë në Kuvend. Nga kolegë të PD dhe LSI propozimi është mbështetur. Ndoshta disa grupimeve si intereson që të lehtësohet procedurat për shtetasit që jetojnë jashtë”, tha Ndreu.
