Një trafikant shqiptar që u përpoq të kalonte kanalin midis Francës dhe Anglisë, në kushte një të ftohti të madh, me tetë persona në një anije, ka dalë para gjykatës në Britani.
Çfarë ndodhi në shkurt:
I arrestuari është 40-vjeçari Afrim Xhekaliu, si pjesë e bandës së trafikantëve të cilët u arrestuan në Kanalin Britanik, pasi po tentonin të fusnin në këtë shtet 9 emigrantë shqiptarë të jashtëligjshëm.
Xhekaliu, i cili jeton në Britani, ishte një prej të arrestuarve të së mërkurës në brigjet e Kent, ku autoritetet i erdhën në ndihmë 9 personave, të cilët u gjendën në vështirësi teksa transportoheshin me një gomone.
40-vjeçari ishte një prej 3 personave të arrestuar. Një prej tyre, sipas BBC, po hetohet në gjendje të lirë, ndërsa për të tretin nuk janë ngritur ende akuzat.
Autoritetet britanike thanë se në gomone ndodheshin 8 burra dhe 1 grua, të cilët i thanë ekipeve të shpëtimit se ishin të gjithë nga Shqipëria.
Xhekaliu mohon shkeljet e ligjit të emigracionit duke përfshirë lehtësimin e sjelljes së paligjshme të të tjerëve në Mbretërinë e Bashkuar.
