Katër personat e arrestuar për 3.4 milion eurot do të dalin të enjten para Gjykatës së Durrësit për vlerësimin e masës së sigurisë, ndërsa policia po vijon kërkimet për dy të shpallurit në kërkim Elvis dhe Alfred Vladi, që besohet se kanë qenë porositës të sasisë monetare.
Verifikimi në sistemin TIMS nuk ka dhënë rezultat pasi dy kushërinjtë Vladi nuk kanë rezultuar të kenë përdorur ndonjë pikë kufitare për të dale jashtë vendit që gjë shton dyshimin se ata mund të jenë larguar ilegalisht ose mund të fshihen brenda vendit.
Pavarësisht kësaj në të gjitha pikat kufitare janë shpërndarë fotot e tyre si dhe të dhëna të tjera për të bërë të mundur identifikimin dhe ndalimin në rast se tentojnë të kalojnë.
Ndërkohë katër të arrestuarit janë rimarrë sërisht në pyetje edhe gjatë të mërkurës por i kanë qëndruar deklarimeve të mëparshme duke mohuar të kenë patur dijeni për sasinë e parave të ndodhura në dy automjetet që vinin nga Belgjika.
SKENARI I FUTJES SË PARAVE NË SHQIPËRI
Alfred Vladi (tashmë i publikuar edhe nga Policia si porositësi i vërtetë i parave) do të qëndronte në Portin e Durrësit për të pritur makinat (të publikuara më parë tip ‘Toyota Yaris’) për të marrë thasët e tij me para.
Ai kishte kontaktuar edhe me Alban Mollaymerin (një kontraktues tjetër i cili është bërë pjesë e super-dosjes nga marrja me qira e makinave ‘Toyota’) për t’u kujdesur për zhdoganimin e makinave të cilat do ti sillte djali i pronarit të servisit nga ku ishin marrë, Edi Lika – Çani(djali i tij Klevis Lika – Çanishoqërues i shoferit Agim Çeku).
Prokuroria ka shprehur se kërkon arrest me burg për katër të arrestuarit. Burime për mediat bëjnë të ditur se Prokuroria ka shprehur dyshime se rruga e bërë Belgjikë-Itali-Durrës është bërë dy herë të tjera nga ky grup.
Madje në të njejtën kohë mendohet se ky grup funksiononte mëse miri për nga rolet e gjithësejcilit prej individëve që bënin pjesë.
/AlpeNews.al
