Sulmuesi spanjoll Suso mund të ndryshojë ngjyrat e qytetit duke kaluar nga Milan tek Inter.
Sky Sport Italia pretendon se Alessandro Luci, agjenti i lojtarit, është takuar disa herë me Zikaltrit me shpresën për të arritur një marrëveshje këtë verë.
Suso ka një klauzolë lirimi 38 mln euro në kontratë por thuhet se ajo vlen vetëm për klubet jashtë Italisë.
Raporti thekson se Milan nuk e ka përjashtuar mundësinë e largimit të tij dhe është gati të dëgjojë ofertat, me Jose Callejon që pritet të jetë zëvendësuesi i tij nëse largohet.
Suso, 24 vjeç, ka debutuar me Spanjën gjatë nëntorit të kaluar dhe ka zhvilluar një sezon të mirë te Milan, duke shënuar gjashtë gola në 35 ndeshje të Serie A.
Në fillim të merkatos ai është përfolur për një kalim te Atletico Madrid por tani mesa duket ajo pistë është zbehur pas transferimit të Thomas Lemar.
