Situata kaotike ka shoqëruar dhe ditën e sotme autostradën Tiranë-Durrës, për shkak të trafikut tejet të rënduar pas nisjes së punimeve për rehabilitimin e rrugës. Gazetari i Report Tv, Arsen Rusta, ka ndjekur sot nga afër situatën, ku qytetarëve ju është dashur të presin mbi një orë në trafik.
Ata kanë pohuar për mikrofonin e Report Tv se kanë pritur 1 orë e gjysmë në rrugë, ndonëse në kushte normale ky aks mund të përshkohet për më pak se një orë.
Shofer 1: Një orë e gjysmë. Sapo kam dalë nga spitali. I kishim parë informacionet në lajme, por nuk e kishim menduar për këtë bllokim.
Shofer 2: Kam një orë e 30 minuta në trafik. E kishim parë në lajme, por jo se do të kishte kaq shumë trafik.
Punimet në autostradë nisën ditën e djeshme, ku u bllokua segmenti Qafë Kashar-Vorë, ndërsa sot puna është zhvendosur në segmentin Vorë-Maminas, në drejtimin Tiranë-Durrës, duke ‘paralizuar’ trafikun. Gazetari Rusta solli dhe pamjet e nga pjesa e riparuar e autostradës, ku për herë të parë janë vendosur dhe vizat e bardha.
