Daniel Delia është 12 vjeçari nga Shkoza, i cili u mbyt rreth mesditës së djeshme në liqenin e Farkës në Tiranë. Ai kishte shkuar bashkë me shokët për t’u freskuar në afërsi të liqenit, por sipas rrëfimeve të shokëve, i mituri ka hyrë në liqen dhe nuk është parë të dalë më.
Ata tregojnë se Danieli e dinte notin, por kanë qenë myshqet brenda në liqen, ato që e kanë penguar të dalë.
Në një prenoncim për Alpenews.al, një nga mësueset e Danielit shprehet se 12 vjeçari ishte djalë çapkën por i dashur me shokët.
“Ishte nga Puka.. Edhe të vëllanë që sot është në gjimnaz, e kemi pasur nxënës në shkollën tonë. Jemi të gjithë në shok, ende nuk na besohet ikja e Danielit. Së bashku me shokët e tij shkuam në shtëpinë e familjes por ishte shumë e vështirë”, u shpreh mësuesja.
Alpenews.al gjithashtu mëson se Danieli vinte nga një familje e thjeshtë, ku e ëma ishte punëtore në një fabrikë këpucësh, ndërsa i ati punëtor i thjeshtë. Familja e tij ka 15 vite që ka ardhur në Tiranë. Burimet thonë se në varrimin e 12 vjeçarit kanë marrë pjesë vetëm tri mësues nga shkolla, me disa nxënës të klasës së tij.
