Nëntë emigrantë, mes të cilëve 6 fëmijë, kanë humbur jetën pas mbytjes së motoskafit me të cilin udhëtonin në ujërat turke, në lindje të Egjeut. Lajmin e bën të ditur agjencia turke e lajmeve, Anadolu.
Sipas të dhënave të para, mjeti ka pësuar një avari në ngushticën Demre, në Gjirin e Antalias, një zonë shumë e frekuentuar nga turistët. Pesë persona janë shpëtuar, ndërsa një tjetër rezulton ende i zhdukur.
Viktimat janë dy burra, një grua dhe gjashtë fëmijë.
Sipas agjencisë tjetër turke, Dogan, emigrantët po përpiqeshin të mbërrinin në Europë. Vendi i parë i arritshëm që është pjesë e BE-së është ishulli grek Kastellorizo,që gjendet përballë qytezës turke Kas. Kombësia dhe identiteti i viktimave nuk janë bërë ende të ditura.
