Ballkani është një rajon “i trazuar” dhe çështjet e pazgjidhura mes vendeve janë të shumta.
Maqedonia ka ende të hapur çështjen e emrit me Greqinë.
Edhe Shqipëria ka një sërë çështjesh të hapura me fqinjin jugor Greqinë për të cilat prej kohësh kanë nisur negociatat.
Negociata po zhvillohen edhe mes Greqisë e Maqedonisë për emrin.
Por teksa bisedimet mes vendeve vijojnë, pritet një takim mes tre kryeministrave.
Lajmi bëhet me dije nga agjencia ballkanike e lajmeve IBNA. Sipas këtyre raportimeve, takimi trepalësh mes Edi Ramës, Zoran Zaev dhe Aleksis Cipras pritet të mbahet në Prespë, pranë kufirit mes tre vendeve.
Sipas agjencisë IBNA, prezenca e kryeministrit shqiptar Rama shihet si garanci që shqiptarët të mos kenë pretendime për emrin e Maqedonisë, për të shmangur ndonjë krizë nacionaliteti në vendin ku shqiptarët janë faktor shtet-formues.
Por pyetja që ngrihet pas këtij raportimi nga kjo agjenci është se pse aty nuk mund të jenë udhëheqës nga shqiptarët e Maqedonisë?
Më tej theksohet se tre kryeministrat do të diskutojnë edhe për sigurinë e rajonit dhe bashkëpunimin në një sërë fushash
