Albert Veliu, që ndryshe njihet si “Dëshmitari X”, i cili u ndalua të dielën nga Policia e Kosovës, ka kërkuar azil në Prishtinë, me pretendimin se në Shqipëri i rrezikohet jeta. Ministria e Brendshme e Kosovës i ka kërkuar informacion Ministrisë së Brendshme në Shqipëri për kërkesën e paraqitur nga Veliu.
Ndërsa mësohet se Drejtoria për Migrim dhe të Huaj në Prishtinë është duke shqyrtuar kërkesën për azil të Albert Veliut. Pasi kjo kërkesë të shqyrtohet, përgjigjja nëse do pranohet apo jo merret brenda 6 muajve nga momenti i depozitimit.
Sipas ligjeve në Kosovë, do të shqyrtohet nëse kërkesa e “Dëshmitarit X” është në përputhje me nenin 5 të ligjit “Për azilin në Republikën e Kosovës. “Republika e Kosovës mund t’u japë mbrojtjen e përkohshme personave që duhen mbrojtur, për aq kohë sa ata i ekspozohen një rreziku të përgjithshëm të rëndë”, parashikohet në këtë ligj.
NDALIMI
Albert Veliu u ndalua të dielën në afërsi të Prishtinës bashkë me të birin dhe sipas burimeve nga Policia vendëse, dyshohet për kalim të paligjshëm kufiri. “Dëshmitari X”, për të cilin Prokuroria e Krimeve të Rënda vijon hetimet, u bë i njohur nga audio-përgjimi i pretenduar me Agron Xhafajn, vëllain e ministrit të Brendshëm.
Policia e Shtetit tha se ende nuk ka ndonjë informacion zyrtar nga Policia e Kosovës, megjithatë nga të dhënat paraprake dyshohet të ketë kaluar ilegalisht kufirin. Fillimisht lajmi u bë i ditur nga mediat kosovare dhe më pas u konfirmua edhe nga Policia e Kosovës, por pa dhënë detaje mbi arsyet e ndalimit.
Veliu dhe djali i tij mësohet se janë ndaluar ditën e diel dhe dyshohet se kanë kaluar në territorin e Kosovës nga kufiri i gjelbër. Kjo, pasi nga verifikimet e kryera në sistemin e Policisë Kufitare, nuk ka rezultuar që ai të jetë regjistruar në momentin e kalimit.
Ndërsa Prokuroria e Përgjithshme tha të hënën se për Albert Veliun nuk ka asnjë urdhër ndalimi dhe as urdhër për ekzekutimin e ndonjë vendimi Gjykate. Ndërsa konfirmoi se Prokuroria e Krimeve të Rënda po vijon hetimet për “trafikim narkotikësh”.
