Pak ditë pas vdekjes së 27-vjeçarit Enea Ftoj në paraburgimin e Komisariatit të Korçës, gjatë ditë së sotme janë zhvilluar protesta para Ministrisë së Brendshme.
Protestuesit kërkojnë të thirret në interpelancë ministri i Brendshëm, Fatmir Xhafaj për të dhënë sqarime për rrethanat e vdekjes së babit të tre fëmijëve. Familjarët kërkojnë drejtësi dhe hedhin akuza në drejtim të policisë, pasi sipas tyre Enea Ftoj është dhunuar.
“Në video duket që është i dhunuar. Kishte brinjët e shpatullën e thyer dhe kishte tre gjilpëra në qafë. Në polici thanë që është vdekje natyrale. Kërkojmë drejtësi për djalin tonë” ka thënë vëllai i 27-vjecarit.
Njoftimi i policisë për ngjarjen:
Më datë 17.05.2018, jemi njoftuar se në dhomat e sigurisë në Komisariatin e Policisë Korçë, ka vdekur shtetasi Enea Ftoj, 27 vjeç, banues në Korçë, i arrestuar në datë 14.05.2018, për veprën penale “Vjedhja me dhunë”.
Nga kqyrja e trupit nuk janë konstatuar shenja dhune dhe nga informacionet paraprake dyshohet se viktima, ka qenë përdorues i lëndëve narkotike.
U ngrit grupi hetimor nën drejtimin e Prokurorit, për të përcaktuar shkaqet e vdekjes, si edhe për të kryer veprimet e nevojshme proceduriale.
