Pas apelit të familjarëve në Report Tv se djali i tyre, Kleant Çela, 29-vjeç ishte larguar nga shtëpia pesë ditë më parë, ai ka telefonuar të ëmën. “Jam shëndoshë e mirë, mos më shqetësoni. Për momentin dua të rri vetëm”, i ka thënë i riu të ëmës, Mbaresa Çela, duke i kërkuar që ta lënë të qetë, ndërsa mbetet e paqartë nëse ai ndodhet brenda Shqipërisë apo është larguar jashtë.
Ai u largua nga shtëpia e tij në qytetin e Vlorës para pesë ditësh, ndërsa familjes i kishtë lënë një letër ku shkruante se po largohej jashtë vendit, ndërsa të afërmve iu kërkonte të mos e kërkonin më kurrë.
“Do të iki përgjithmonë jashtë Shqipërisë, mos më kërkoni më, iu uroj gjithë të mirat”, shkruhej në letrën e Kleant Çelës lënë për familjarët e tij. Këta të fundit iu drejtuan Report Tv duke i apeluar djalit të tyre që të kthehej në shtëpi. Pas apelit në Report Tv, Kleant Çela vendos të komunikojë me nënën e tij, por lajmi që ajo merr nga i biri nuk është ai që do dëshironte çdo nënë, pasi ai ka refuzuar të kthehet dhe për më tepër, i ka kërkuar ta lënë të qetë.
